ŊWÀꞋ RNƐ̀SÌ 108
Wèr be so njobèꞌ Nyʉ̀ yu wèr wowèe
1 Oo Nyʉ̀, ya ntee yi yu njep wɛ̀!
M be yòp kuꞌsi wɛ̀ nè ya ntee wɛɛwɛ.
2 M be yɛ̀ɛsi rluŋ ba ntakup!
M be lɛꞌ à mʉ jìpjìp nɛ̀si wɛ̀!
3 Oo Yawɛ̀, m be yòŋshi wɛ̀ àmʉ̀ bèe;
m be yòp yɛɛ rnɛ̀sì nè wɛ̀ kùntombì nè btoꞌ.
4 Lo rkòŋnì li ràa à baꞌ mbe làlàa buu;
yò mini à raa a baꞌ mbe mʉ̀ mmbàꞌ.
5 Oo Nyʉ̀, tɛ bèe a nàa lo rlii mbekì caa mbe làlàa buu,
tɛ yo fòo yi ruu mbe tunshè bìi!
6 Bèesi wèr, jaꞌ wèr à yo ŋger
tɛ bèe ce wɛ̀ kòŋ a bo lùŋ!
7 Nyʉ̀ à làa embe Yě ndàp enɛ̂,
“M be gàpshi ŋgǒŋ Shɛkɛ̀m nè rluꞌshì—ŋwɛ̀,
kèr gàpshi ntòŋ e à ŋgǒŋ Sokòt.
8 Ŋgǒŋ Giled a ya; ŋgǒŋ Mànasɛ̀ à ba ya,
ŋgǒŋ Ɛfrɛ̀m à ba la rtaa bìr,
ŋgǒŋ Judà à ba yà mbàŋ kʉʉ.
9 Ŋgǒŋ Muap yu ya yuu ce mɛ ke sùꞌsi buu njoo;
maꞌ ya labaꞌ mbendù ŋgǒŋ Ɛdòm;
tondèe enɛ mɛ̀ so ŋgǒŋ Fìlishà.”
10 Ŋwɛ̀ ce e be dù nè mɛ̀ à rlaꞌ ce a boo ŋkaꞌ a sir àgho a nda?
Ŋwɛ̀ ce e be càŋsi mɛ̀ dù àgho à ŋgǒŋ Ɛdòm a nda?
11 Oo Nyʉ̀, mbò wɛ̀ maꞌ wèr a?
Oo Nyʉ̀, wɛ̀ ker bii dù wèe wer bsoogɛ̀ wèe kaꞌ.
12 Ôo, jàꞌ wèr efa yèr ŋwɛ̀ bbàa,
njobèꞌ rjàꞌ ce li lò ba ese ŋwɛ̀ yu cicì.
13 Wèr be so njobèꞌ Nyʉ̀ yu wèr wowèe;
a ye ce e be nyɛ̀ŋshi yer ŋgǎa bbàa.
ŊWÀꞋ RNƐ̀SÌ 112
Yuu yi be kè cìꞌ ŋwɛ̀ ce e yu kùyɛɛ kaꞌ
1 Nɛ̀si Yawɛ̀!
Mmbǒŋtu mi yu nè ŋwɛ̀ ce e ke wɛp Yawɛ̀,
ce yuꞌ rbòŋ nè yuu ce Yawɛ̀ à làa sê.
2 Yì ŋgʉ̀ be tʉr ŋger mbe ŋgòŋ,
Nyʉ̀ be ghòni ŋgʉ̀ ŋwɛ̀ ce e yu kùyɛɛ.
3 Yì ndap be kùꞌ à buu,
e be ba kùyɛɛ à nfèꞌ wɛɛwɛ.
4 Rraa li ke raa à tʉ̀ꞌnji nè ŋwɛ̀ ce e yu kùyɛɛ,
e ke tʉr ntee bòŋboŋ ce koosi mnse nè bèe, a ker ba kùyɛɛ.
5 Ŋwɛ̀ ce e yu mmbo mntoo a ce fòosi buu nè bèe be yuꞌ rbòŋ,
yu ŋwɛ̀ ce e ke gèe yì buu kùyɛɛ.
6 Yuu yi be kè cìꞌ ŋwɛ̀ ce e yu kùyɛɛ kaꞌ,
a be ce kuushi ye à nfèꞌ wɛɛwɛ.
7 E ke wɛp à ryuꞌ nsuŋ mbembep kaꞌ,
yi ntee yi ke ba tatap, e ce fa bfee nè Yawɛ̀.
8 Yi ntee yi be buꞌ kaꞌ, e be wɛp yuu kaꞌ,
caar yɛ àmbò a so yi ŋgǎa bbàa.
9 E gàp buu àwàa, e fa buu nè ŋgǎa fùp,
e tʉr ntee bòŋboŋ à nfèꞌ wɛɛwɛ,
e be tʉr ŋger tɛ a naa ye mbekì.
10 Ŋwɛ̌ mbembep e yɛ waꞌa, ntee yi koꞌ ye enjoo,
e kʉr mnsòŋ, bʉ.
Yuu ce ŋwɛ̌ mbembep ce kòŋ yi be bʉ à cicì!
ŊWÀꞋ RNƐ̀SÌ 113
Ŋwɛ̀ ce e yu àmbò Yawɛ' ce E yu yìsèe Nyʉ̀ a nda?
1 Nɛ̀si nè Yawɛ̀!
Oo ŋgǎa mfàꞌ Yawɛ̀, nɛ̀si nè Ye,
nɛ̀si nè rlii Yawɛ̀!
2 Nɛ̀si nè rlii Yawɛ̀,
kɛꞌ e sèꞌni du kùntombì ker ba à nfèꞌ wɛɛwɛ.
3 Yi yu enɛ wèe nɛsi Yawɛ̀,
kɛꞌ embe nfèꞌ ce nyʉ̀ à bàp du baꞌ mbe nfèꞌ ce e coo.
4 Yawɛ̀ yu mbe bùu a ce saꞌ btoꞌ wɛɛwɛ,
Yi fòo yi koꞌ a caa mbe làlàabuu.
5 Ŋwɛ̀ ce e yu àmbò Yawɛ̀ ce e yu yìsèe Nyʉ̀,
ce e cu mbe bùu a nda,
6 a ce fyɛꞌ rbuu ba nshe a nda?
7 E ke fʉr ŋgàa fùp efa fùp,
fʉr mbuuyuu wèe embà ŋgòŋ,
8 gee wowèe a ba à běe bgòrgòr,
běe bgòrgòr efa mʉ̀ yì bèe,
9 E ke gèe enɛ njeŋwɛ̀ ce e yu kar tʉr ndap yì,
gee ye e ce luꞌshi à ma boo.
Nɛ̀si nè Yawɛ̀
ŊWÀꞋ RNƐ̀SÌ 116
Mɛ̀ kòŋ Yawɛ̀
1 Mɛ̀ kòŋ Yawɛ̀ njobèꞌ E yuꞌ yà njèndòŋ,
a yuꞌ la rwar ce m ce war enɛ E koosi mnse nè mɛ̀.
2 À kaꞌ ba njobèꞌ E m ta tùꞌ nè mɛ̀,
banɛ m be kɛꞌ Li rlii tètè àmbò mɛ̀ bii ntèe.
3 Rkwe li m lip mɛ̀ àmbò taa waꞌa,
rwɛp efa rkwe li m koo mɛ̀,
mɛ̀ yɛ mlù a ce seŋ buu.
4 Awɛ, mɛ̀ kɛꞌ rlii Yawɛ̀ enɛ̂,
“Oo Yawɛ̀, kee wɛ̀ jàꞌ mɛ̀!”
5 Yawɛ̀ tʉr ntee bòŋboŋ, a ba kùyɛɛ,
yìsèe Nyʉ̀ yu Nyʉ̀ ŋkoosimnse.
6 Yawɛ̀ ke tɛꞌshi bèe ce àdeꞌ a tɛꞌshì yap tu kaꞌ,
mɛ̀ m ba à mlù E jaꞌ mɛ̀.
7 Oo la ryòŋ, kèr lʉshî,
njobèꞌ Yawɛ̀ à gèe bòŋboŋ nè wɛ̀.
8 Yi yu waꞌa njobèꞌ wɛ̀ fʉr la ryòŋ efa rkwe,
a siŋsi ma mŋgoommir,
a keꞌni ma mŋkùu fà dìꞌ m kote kaꞌ.
9 M be jɛ̀r àmbò Yawɛ̀ ce kòŋ,
àmbo m ce cu njep ŋgòŋ na.
10 Kaꞌ mɛ̀ m làa enɛ̂, “Mlù mi yu nè mɛ̀ sê” waꞌa,
a ku byemi nè Yawɛ̀.
11 Mɛ̀ m ce wɛp, a laa enɛ̂,
“Ŋwɛ̀ wɛɛwɛ yu ŋwɛ̀ mnde'.”
12 Yuu ce àdeꞌ m fa nè Yawɛ̀
àtu buu bbòŋboŋ wɛɛwɛ ce E gèe nè mɛ̀ a kɛ?
13 M be fa rfa nè mrùꞌ njo Yawɛ̀ à gèe mɛ̀ lûŋ,
kɛꞌ à Li rlii.
14 M be ruusi ma mŋkàꞌni nè Yawɛ̀,
à bsii Yì bèe wɛɛwɛ.
15 Yawɛ̀ e ke yɛ rkwe bèe
ce a yu Yì bèe à lulu.
16 Oo Yawɛ̀, a mɛ̀ yò ŋwɛ̀ rfàꞌ.
A mɛ̀ yò ŋwɛ̀ rfàꞌ, muu yò ŋwɛ̀ rfàꞌ ce njeŋwɛ̀.
Wɛ̀ fyɛ̀ɛshi mɛ̀ bshaŋ.
17 M be gèe taŋshì ce à ryòŋshì nè wɛ̀,
kɛꞌ à lo rlii.
18 M be ruusi ma mŋkàꞌni nè Yawɛ̀,
à bsii Yì bèe wɛɛwɛ.
19 M be ruusi mmi mbe rlaꞌ mbe dìꞌ ce ndap Nyʉ̀ à tɛɛ,
mbe wěe mʉ, oo Jɛ̀rusalɛ̀m.
Nɛ̀si nè Yawɛ̀!
ŊWÀꞋ RNƐ̀SÌ 117
Bèe wɛɛwɛ a nɛsi Yawɛ̀
1 Btoꞌ wɛɛwɛ, nɛ̀si nè Yawɛ̀!
Bèe wɛɛwɛ, kùꞌsi nè Ye!
2 Kùꞌsi nè Ye njobèꞌ Li rkòŋnì ce nfesè ce E tʉr nè sèe li yu rgòr,
mini Yawɛ̀ à ba nfesè.
Nɛ̀si nè Yawɛ̀!
ŊWÀꞋ RNƐ̀SÌ 118
Li rkòŋnì ce nfesè li yu à nfèꞌ wɛɛwɛ
1 Ôo, yòŋshi nè Yawɛ̀, njobèꞌ e bòŋ,
Li rkòŋnì ce nfesè li yu à nfèꞌ wɛɛwɛ!
2 Bèe Isrɛ̀l, làa nè enɛ̂,
“Li rkòŋnì ce nfesè li yu à nfèꞌ wɛɛwɛ.”
3 Mbùundap Ɛròn, làa nè enɛ̂,
“Li rkòŋnì ce nfesè li yu à nfèꞌ wɛɛwɛ.”
4 Bèe ce a ce wɛp Yawɛ̀, làa nè enɛ̂,
“Li rkòŋnì ce nfesè li yu à nfèꞌ wɛɛwɛ.”
5 Mlù mi m ba nè mɛ̀, mɛ̀ war nè Yawɛ̀,
Yawɛ̀ à beesì mɛ̀, a fʉr mɛ̀ enjoo.
6 Yawɛ̀ yu wèr Ye, m be wɛp yuu moꞌ kaꞌ.
Yuu ce àdeꞌ ŋwɛ̀ gee nè mɛ̀ a kɛ?
7 Yawɛ̀ yu wèr ye, à ba Ye yà ŋwɛ̀ rjàꞌ.
M be fyɛꞌ yɛ àmbò a so ya ŋgǎa bbàa.
8 Yi yu àndèe à rsʉ̀rnì njeptii Yawɛ̀
nè ce enɛ à fa bfee nè ŋwɛ̀.
9 Yi yu àndèe à rsʉ̀rnì njeptii Yawɛ̀,
nè ce enɛ à fa bfee nè boo mnlii.
10 Btoꞌ wɛɛwɛ vi m sìr mɛ̀,
mɛ̀ bepsì wowèe à rlii Yawɛ̀.
11 Wowèe a m sìr mɛ̀, a sir a tarte,
mɛ̀ bepsì wowèe à rlii Yawɛ̀.
12 Wowèe a m bòo mɛ̀ àmbò nyʉʉ waꞌa,
a kweŋger àmbò mor ce yi koti à mnsini waꞌa,
mɛ̀ bepsì wowèe à rlii Yawɛ̀.
13 Wowèe a m dòo mɛ̀ à ŋger, mɛ̀ ce sɛni gwè,
geewaꞌa, Yawɛ̀ à jaꞌ mɛ̀.
14 Yawɛ̀ yu ya ŋger, a ba ya yɛɛ,
a Ye ce E jàꞌ mɛ̀.
15 A ce yòp byɛɛ rso nè rluꞌshì—ŋwɛ̀ à mndap bèe ce a yu kùyɛɛ,
ŋger Nyʉ̀ yi ke vʉ̀ nè rso.
16 Yawɛ̀ e ke nàa ŋwɛ̀ mbekì à Yi ŋger,
ŋger Yawɛ̀ yi ke vʉ̀ nè rso.
17 M be kwe kaꞌ, m be cu ntèe,
tɛ m bo suŋ buu ce Yawɛ̀ à gèe.
18 Yawɛ̀ à nàshi mɛ̀ tatap sê,
geewaꞌa, a keꞌ maꞌshi enɛ m kwe kaꞌ.
19 Mʉ̀ꞌ nè mɛ̀ cùu ŋkaꞌ embe ndàp Nyʉ̀,
tɛ m bo niŋ njǐ mboo,
yòŋshi Yawɛ̀.
20 Cena a cùu ŋkaꞌ ce yi ce dù fa Yawɛ̀,
bèe ce a yu kùyɛɛ a be niŋ njǐ mboo.
21 M ce yòŋshi wɛ̀ njobèꞌ wɛ̀ bèesi mɛ̀,
a gee mɛ̀ sô.
22 Lùr ce ŋgǎa mboo mndap a m màꞌ
a kʉti ba lùr rbuundap.
23 Cena à gèe Yawɛ̀,
à ba yuu bɛ̀ɛ à mer mmir.
24 Cena a nòŋ ce Yawɛ̀ à gèe,
banɛ sèe luꞌshi ker yuꞌ rbòŋ àgho.
25 Oo Yawɛ̀, wèr ce loo enɛ à jaꞌ wèr,
Oo Yawɛ̀, wèr ce loo enɛ à gee tɛ wèr so.
26 Nyʉ̀ ghoni ŋwɛ̀ ce e vʉ̀ à rlii Yawɛ̀!
Wèr ce kùꞌsi wɛ̀ embe ndàp Yawɛ̀.
27 Yawɛ̀ yu Nyʉ̀,
a gee Li rraa li ce raa mbe wěr ndù.
Kur nè mnyàa taŋshì nè bkʉ̀,
ko' àgho mbe dǐꞌ ntòo rfa.
28 A wɛ̀ yà Nyʉ̀, m be yòŋshi wɛ̀,
a wɛ̀ yà Nyʉ̀, m be nɛ̀si wɛ̀.
29 Ôo, yòŋshi nè Yawɛ̀, njobèꞌ E bòŋ,
Li rkòŋnì ce nfesè li yu à nfèꞌ wɛɛwɛ!
ŊWÀꞋ RNƐ̀SÌ 121
La rjàꞌ li ke vʉ̀ ba ese Yawɛ̀
1 Mɛ̀ nàa ma mmir a fyɛꞌ mbe mntùu.
La rjàꞌ li ke vʉ̀ ba efɛ?
2 La rjàꞌ li ke vʉ̀ ba ese Yawɛ̀,
ce e m boo rbuu ba tunshe.
3 E be màꞌshi wɛ̀ tɛ à sɛɛ kaꞌ,
Ye ce e ke keꞌ à wɛ̀ be yɛ̀' kaꞌ.
4 Yɛ̂, ŋwɛ̀ ce e ke kèꞌni bèe Isrɛ̀l
e ke yɛ̀ꞌ kaꞌ, buumi kaꞌ.
5 Yawɛ̀ a ŋwɛ̀ ce e ke kèꞌni wɛ̀;
Yawɛ̀ a ŋwɛ̀ ce e ke ba àgee wɛ̀, ce tɛꞌshi wɛ̀.
6 Nyʉ̀ be tòo wɛ̀ nèwaŋ kaꞌ,
tɛ ŋwɛɛa yi gee yuu nè wɛ̀ nètʉꞌ kaꞌ.
7 Yawɛ̀ be tɛꞌshi wɛ̀ efa yuu bebep wɛɛwɛ;
kèr tɛꞌshi lo ryòŋ.
8 Yawɛ̀ be tɛꞌshi wɛ̀ mbe nfèꞌ ce à ce fʉʉ, ba mbe nfèꞌ ce à ce kʉti,
kɛꞌ e sèꞌni na du baꞌ àlʉ̀simbùu.
a121:6 Bèe moꞌ a m byemi yap enɛ ŋwɛɛ yi ke ràa ncùu waꞌ gee byaŋ vi ce koo bèe, àmbò kàꞌ ba
byaŋ moꞌ jɛɛ jɛ̀ɛ jɛɛ
ŊWÀꞋ RNƐ̀SÌ 122
Sèe du mbe ndàp Yawɛ̀
1 Mɛ̀ m luꞌshi mbe nfèꞌ ce a m làa nè mɛ̀ enɛ̂,
“Sèe du mbe ndàp Yawɛ̀.”
2 Oo Jɛ̀rusalɛ̀m,
wèr à tɛɛ sèꞌni mbe yo ncùu ŋkaꞌ.
3 Jɛ̀rusalɛ̀m a rlaꞌ ce a bàꞌri
li ba àbee,
4 à ba rlaꞌ ce mntɛ̀ꞌ bèe Isrɛ̀l,
ce a ke loo nè Yawɛ̀ a ke koꞌ mboo,
àmbò Yawɛ̀ à m làa nè Isrɛ̀l,
tɛ wowèe a bo yòŋshi Ye.
5 A m tɛr bkàbàrà' mnsaꞌ àfo,
à ba bkàbàràꞌ embe ndàp Dɛvìd.
6 Loo enɛ cumʉnyaŋ ba à rlaꞌ Jɛ̀rusalɛ̀m!
“M ce loo enɛ bèe ce a kòŋ Jɛ̀rusalɛ̀m a cu yɛɛnì!
7 Loo enɛ cumʉnyaŋ ba fa wěe mlàꞌ,
tɛ Yawɛ̀ tɛꞌshi wèe à wee mndap.”
8 À kaꞌ ba njoꞌ bfʉr wa ba bkar wa,
m be làa enɛ̂, “Cumʉnyaŋ ba nè wèe!”
9 À kaꞌ ba njoꞌ ndap Yawɛ̀ ce e yu yìsèe Nyʉ̀ ,
m be kòŋ enɛ buu ba yɛɛnì nè wèe.
ŊWÀꞋ RŊƐ̀SÌ 127
Yawɛ̀ a ŋwɛ̀ ce e ke bàꞌri
1 Yawɛ̀ kaꞌ tɛ bàꞌri ndap kaꞌ,
banɛ bèe ce a ce bàꞌri a fàꞌ ba à cicì.
Yawɛ̀ kaꞌ tɛ kèꞌni rlaꞌ kaꞌ,
banɛ ŋwɛ̀ rkèꞌnì ce kèꞌni à cicì.
2 À rnyɛɛ à mʉ ŋgàptʉꞌ ce fàꞌ caar kʉti mbe ndàp njep nfèꞌ kaꞌ
tɛ à bo koni yuu ye à yo ŋger yi yu à cicì.
Yi yu wa'a njobèꞌ Yawɛ̀ a ŋwɛ̀ ce e ke fa buu nè bèe ce E kòŋ.
3 Yɛ̂, Yawɛ̀ a ŋwɛ̀ ce e ke fa bèe boo,
boo à ba ghònì ce mini.
4 Boo ce ŋwɛ̀ à bi à muu nsùnsù,
a yu àmbò mnjɛɛ mbà bo ŋwɛ̀ màꞌ bìr waꞌa.
5 Mmbǒŋtu mi yu nè ŋwɛ̀
ce yi teꞌ mnjɛɛ yi ruu nè mnjɛɛ anà!
Be ba mbe nfèꞌ ce e ce rè a yi ŋgǎa bbàa wèe mbe cǔu ŋkaꞌ nà,
tɛ wowèe a coosi ye kaꞌ.
ŊWÀꞋ RNƐ̀SÌ 130
La ryòŋ li ce kèꞌ Yawɛ̀
1 Oo Yawɛ̀, mɛ̀ war nè wɛ̀,
njobèꞌ mɛ̀ yu à mlù sê.
2 Oo Tatâ, yuꞌ yà njèndoŋ!
Ta tùꞌ yuꞌ yà njèndoŋ,
ce m ce loo wɛ̀ enɛ à koosi mnse nè mɛ̀!
3 Oo Yawɛ̀, kaꞌ ba enɛ à ce bè' buu bbebep bèe,
oo Tatâ, ŋwɛ̀ ce àdeꞌ e sortì a nda?
4 Geewaꞌa, wɛ ke fòosi buu bbebep bèe,
tɛ a bo wɛp wɛ̀.
5 M ce kèꞌ Yawɛ̀,
a ce kèꞌ Ye nè ya ntee—ŋwɛ̀,
a ce keꞌ yu ce E làa.
6 La ryòŋ li ce kèꞌ Tatâ,
caa àmbò ŋgǎa rcìŋ a ke ce kèꞌ enɛ tʉ̀ꞌ raa,
caa àmbò ŋgǎa rcìŋ a ke ce kèꞌ enɛ tʉ̀ꞌ raa.
7 Oo Isrɛ̀l, fa nè bfee nè Yawɛ̀!
Fa nè bfee nè Ye njobèꞌ Li rkòŋnì li yu nfesè,
E ke kòŋ à rjàꞌ wèe sê.
8 E be jàꞌ Isrɛ̀l,
efa yì buu bbebep wɛɛwɛ.
ŊWÀꞋ RNƐ̀SI 139
Oo Nyʉ̀, fyɛꞌ mɛ̀ riŋ ya ntee
1 Oo Yawɛ̀, wɛ̀ fyɛꞌ mɛ̀,
a riŋ mɛ̀.
2 Wɛ̀ rìŋ nfèꞌ ce mɛ ke cuu à nshè, a riŋ nfèꞌ ce mɛ ke nàti mbekì.
Mɛ bii kaꞌ kwàꞌshi yuu, wɛ̀ ba nè riŋ wɛɛ.
3 Mɛ bii kaꞌ kwàꞌshi à rjɛ̀r kèr kwàꞌshi à rnòŋ, wɛ̀ ba nè riŋ wɛɛ.
Wɛ̀ rìŋ la rjɛ̀r wɛɛwɛ.
4 Oo Yawɛ̀, tɛ m kaꞌ mʉ̀ꞌ cùu enɛ m ce làa yuu,
wɛ̀ ba nè riŋ yi wɛɛwɛ.
5 Wɛ ke kèŋte mɛ̀ e mbenjì ba e kùntombì,
a laꞌ yo bo mbe mɛ̌ ndùu.
6 Njɛ̀ɛ rrìŋ buu anà yi càa ya ŋger,
li yu rgòr ce àdeꞌ m riŋ kaꞌ.
7 M kaꞌ lo efa gee wɛ̀ m du ba fɛ?
M kaꞌ caŋ efa wo bsii m du ba fɛ?
8 M kaꞌ koꞌ mbe bùu, à ku ba mboo!
M kaꞌ noŋ mbà yìr, à ku ba mbǎ!
9 M kaꞌ fɛŋ du kùmbùunti,
du cu nje ntee rdip rgòr,
10 kaꞌ àfo, à be càŋsi mɛ̀ nè yo bo,
kèr ghashi mɛ̀ nè yo bo màꞌ.
11 M kaꞌ laa enɛ̂, “Tʉ̀ꞌnji be cete mɛ̀,
tɛ rraa efa mɛ̌ geŋ li kʉti à nètʉꞌ”,
12 kaꞌ tʉ̀ꞌnji be sii nè wɛ̀ kaꞌ,
nètʉꞌ yi be ce raa àmbò nèwaŋ,
njobèꞌ tʉ̀ꞌnji ku ba ǹe wɛ̀ àmbò rraa waꞌa.
13 Wɛ̀ m gèe wa bdìꞌ nyor enjep mʉ,
a cʉꞌshi vi njep rbʉ̀ yà ma àbee.
14 M ce nɛ̀si wɛ̀ njobèꞌ wɛ̀ m boo mɛ̀ à njì ce ŋwɛ̀ wɛp kèr bɛ̀ɛ.
Mo mfàꞌ mi yu mǐ mmbɛ̀ɛ,
mɛ̀ riŋ waꞌa yɛɛnì sê.
15 Bvʉp moꞌ enje mɛ̌ nyòr vi m sʉ̀rni
mbe nfèꞌ ce wɛ̀ m ce boo mɛ̀ à bsʉ̀ti kaꞌ.
Wɛ̀ m lòr nfèꞌ a yuŋte mɛ̀ nje rbʉ̀ yà mâ.
16 Mo mmir mi m yɛ mɛ̀ mbe nfèꞌ ce a m ku koo la rbʉ̀ koo.
Wɛ̀ m saŋ wa mnòŋ
ce wɛ̀ m lɛ̀ enɛ m be cu wɛɛwɛ mbe wɛ̌ ŋwàꞌ,
tɛ vi kaꞌ kɛ̀ꞌ ce ba.
17 Oo Nyʉ̀, mo mŋkwàꞌshì mi bòŋ sê!
A kaꞌ tarshi mi wɛɛwɛ mi ba gòr àmbò kɛ!
18 Mɛ̀ kaꞌ ba ce beꞌ mi,
mi ba càa nsaruŋ.
Mɛ̌ lɛꞌ, ku bii wèe sò.
19 Oo Nyʉ̀, ce wɛ̀ ba sɛsi běe bbebep!
Oo ŋgǎa nyʉshi bèe, lɛꞌsi nè nyor efa mɛ̌ geŋ!
20 Wowèe a ce làa àmbò wɛ̀ nè ntee sii.
Yo ŋgǎa bbàa a lòr lo rlii à cicì.
21 Oo Yawɛ̀, mbò mɛ̀ bàa bèe ce a bàa wɛ̀ a?
Mbò mɛ̀ jàasi bèe ce a ce rè wɛ̀ a?
22 Mɛ̀ bàa wowèe a tɛꞌ kɛkɛŋ,
a beꞌ wowèe à ya ŋgǎa bbàa.
23 Oo Nyʉ̀, fyɛꞌ mɛ̀, yɛ ya ntee!
Taase mɛ̀, riŋ ma mŋkwàꞌshi.
24 Fyɛꞌ enɛ yuu bebep moꞌ yi yu njep mɛ̀ lɛ,
caŋsi mɛ̀ njep nduunjì ce yi yu nfesè.
ŊWÀꞋ RNƐ̀SÌ 145
Yawɛ̀ yu ŋgòr
1 Yà Nyʉ̀ ba yà ŋkʉʉ, m be nàa wɛ̀ mbekì,
kèr nɛ̀si lo rlii à nfesè ba nfesè.
2 M be kùꞌsi wɛ̀ à mnòŋ wɛɛwɛ,
nɛ̀si lo rlii à nfesè ba nfesè.
3 Yawɛ̀ yu ŋgòr, a ghɛɛte enɛ a nɛsi Ye sê,
àdeꞌ a feꞌ Vi bkùꞌ kaꞌ.
4 Ŋgʉ̀ bèe mòꞌ be vʉse mo mfaꞌ nè ŋgʉ̀ mòꞌ,
kèr suŋ kuꞌ buu ce wɛ̀ gèe.
5 M be kwàꞌshi àmbò rbòŋ ce li yu njep fòo efa yo kʉʉ,
kèr kwàꞌshi àmbò mo mfǎꞌ mmbɛ̀ɛ.
6 Bèe a be suŋ àmbò ŋger efa mo mfǎꞌ mmbɛ̀ɛ,
tɛ m suŋ ya ba àmbò wo bkùꞌ.
7 Bèe a be yòp àmbò yo ŋgěe bòŋboŋ ce yi yu gòr,
kèr yòp mbekì àmbò à yu kùyɛɛ.
8 Yawɛ̀ yu ŋwɛ̀ mmbǒŋntee, a ba ŋwɛ̀ ŋkoosimnse,
a ba wɛ̀ni à rshentee, a ruu nè rkòŋnì ce nfesè.
9 Yawɛ̀ à bòŋ nè ŋwɛ̀ wɛɛwɛ,
Yì ŋkoosimnse à ba mbendù yuu wɛɛwɛ ce E m gèe.
10 Oo Yawɛ̀, buu wɛɛwɛ ce wɛ̀ m gèe vi be yòŋshi wɛ̀,
tɛ yò bèe wɛɛwɛ a nɛsi wɛ̀.
11 Wowèe a be suŋ àmbò fòo ce yi yu mbe wɛ̌ dìꞌ kʉʉ,
suŋ àmbò yo ŋger,
12 tɛ bèe a bo rìŋ mo mfǎꞌ mmbɛ̀ɛ,
ba rbòŋ ce li yu njep fòo efa yo kʉʉ.
13 Yo dìꞌ kʉʉ yu dìꞌ kʉʉ ce nfesè,
wɛ̀ tʉr ŋger mbendùu buu wɛɛwɛ à nfesè.
Yawɛ̀ e ke làa yuu tɛɛ njoo,
a tʉr ntee bòŋboŋ à buu wɛɛwɛ ce E ke gèe.
14 Yawɛ̀ e ke ghashi bèe ce a ce gwè,
naa bèe ce buu à yiꞌshi wowèe.
15 Mmir bèe wɛɛwɛ mi ke fyɛꞌ mbendù wɛ̀,
à ce fa wowèe wap byee njep nfèꞌ.
16 Wɛ ke mʉ̀ꞌ yo bo,
fa buu btèe wɛɛwɛ buu ce a ce kòŋ.
17 Yawɛ̀ yu kùyɛɛ à buu wɛɛwɛ ce E ke gèe,
a tʉr ntee bòŋboŋ à buu wɛɛwɛ ce E ke gèe.
18 Yawɛ̀ yu àtʉtʉ nè bèe wɛɛwɛ ce a ke kɛꞌ Ye,
nè bèe wɛɛwɛ ce a ke kɛꞌ Ye nè mini—ŋwɛ̀.
19 E ke gèe yuu ce bèe ce a ce wɛp Ye a kòŋ,
ker yuꞌ lap rwar, jaꞌ wowèe.
20 Yawɛ̀ e ke kèꞌni ŋwɛ̀ wɛɛwɛ ce e kòŋ Ye,
geewaꞌa E be yʉshi běe bbebep wɛɛwɛ.
21 Ya cùu yi be nɛ̀si Yawɛ̀,
tɛ buu btèe wɛɛwɛ vi nɛsi Li rlii ce li yu rrara à nfesè ba nfesè.
ŊWÀꞋ RNƐ̀SÌ 119
Wo blàa vi yu àmbo rraa nè ma mŋkùu waꞌa
Alɛ̀f
1 Mmbǒŋtu mi yu nè bèe ce yap ŋgèe yi yu kùyɛɛ,
à ba bèe ce a ce jɛ̀r àmbò ncir Yawɛ̀ yi ce làa.
2 Mmbǒŋtu mi yu nè bèe ce a yuꞌni nè Vi mncir,
à ba bèe ce a ce ròo ye nè yap ntee—ŋwɛ̀.
3 Wowèe a ke gèe yu bebep kaꞌ foŋ,
ku ce jɛ̀r ba àmbò Yawɛ̀ ce làa.
4 Yawɛ̀, wɛ̀ fa wo mncir enɛ
a lɛ vi yɛɛnì.
5 M ce kòŋ à rce yuꞌni
nè wo mncir à nfèꞌ wɛɛwɛ,
6 M kaꞌ lɛ mmir mbendùu wo mncir,
banɛ rìtu yi be koo mɛ̀ kaꞌ.
7 M be nɛ̀si wɛ̀ nè ntee rara,
mbe nfèꞌ ce mɛ̀ yɛꞌni wo mncir ce vi yu kùyɛɛ.
8 M be lɛ̀ wo mncir,
fa màꞌshi mɛ̀ dʉ̀dʉ̀ kaꞌ.
Bɛ̂t
Yuꞌni nè mncir Yawɛ̀
9 Àdeꞌ muu nsùnsù cu rcu rrara à njɛ̌ɛ kɛ?
Àdeꞌ e cu à njɛ̀ɛ njì ce e ce yuꞌni nè wo blàa.
10 M ce ròo wɛ̀ nè ya ntee—ŋwɛ̀,
fa màꞌshi tɛ m lɛꞌti enje wo mncir kaꞌ,
11 Mɛ̀ lɛ̀ɛ wo blàa njep mɛ̌ ntee,
fà dìꞌ m bo gèe yuu bebep nè wɛ̀ ka'.
12 Oo Yawɛ̀, m ce nɛ̀si wɛ̀,
yɛꞌni mɛ̀ wo mncir.
13 M be suŋ bèe wo mncir
ce wɛ̀ fa wɛɛwɛ.
14 M ce luꞌshi à ryuꞌni nè wo mncir
caa àmbò m ce luꞌshi nè kuꞌ buu ce mɛ̀ tʉr.
15 M be ce kwàꞌshi àmbò wo mncir
ce jɛ̀r àmbò wɛ̀ ce kòŋ enɛ m jɛ̂r.
16 M be luꞌshi à wo mncir,
kè' lèsi wo blàa kaꞌ.
Gemɛ̀l
Rbòŋ ce li yu njep mncir Yawɛ̀
17 Gèe bòŋboŋ nè mɛ̀ ce yò ŋwɛ̀ rfàꞌ,
tɛ m bo cu, ce yuꞌni nè wo blàa.
18 Mʉ̀ꞌ ma mmir tɛ m bo yɛ
buu bbɛ̀ɛ ce vi yu njep yo ncir.
19 M yu ŋkèe mbe tunshè,
fa sʉ̀rti wo mncir ese mɛ̀ kaꞌ.
20 Ya ntee yi ce lùute
à rrìŋ wo mncir à nfèꞌ wɛɛwɛ.
21 Wɛ ke lapni ŋgǎa nàa nyor ce ndòo à coꞌ wowèe,
à ba bèe ce a lɛꞌti efa wo mncir.
22 Fa màꞌshi tɛ wowèe a ce cɛp mɛ̀ kèr ce vʉ̀shi mɛ̀ kaꞌ,
njobèꞌ mɛ̀ yuꞌni nè wo mncir.
23 Kaꞌ boo mnlii a cu mncʉ̀ nè mɛ̀ waꞌa,
yò ŋwɛ̀ rfàꞌ be kù ce kwàꞌshi àmbò wo mncir.
24 M ce luꞌshi nè wo mncir,
vi ke cep mɛ̀.
Dalɛ̀t
Fa ntee à ryuꞌni nè mncir Yawɛ̀
25 Mɛ̀ tɛɛ yǐ ŋkwe,
kʉsi la ryòŋ àmbò wɛ̀ làa!
26 À m ba mbe nfèꞌ ce mɛ̀ m suŋ wɛ̀ àmbò ya ŋgèe, wɛ̀ beesì mɛ̀.
Yɛꞌni mɛ̀ wo mncir!
27 Jàꞌ mɛ̀ tɛ m riŋ yuu ce wo mncir vi ce làa,
tɛ m bo ce kwàꞌshi àmbò mo mmfàꞌ ce mghaghaꞌ.
28 Mlù mi ce sɛ̀ɛsi mɛ̀,
fa mɛ̀ ŋger àmbò wɛ̀ làa!
29 Fɛɛsi mɛ̀ efa ŋgèe mmboꞌni,
tʉr ntee bòŋboŋ nè mɛ̀, yɛꞌni mɛ̀ wo mncir.
30 Mɛ̀ ce à rba mini,
mɛ̀ fa bfee nje wo mncir.
31 Oo Yawɛ̀, mɛ̀ ghashi wo mncir,
fa màꞌshi tɛ rìtu yi koo mɛ̀ kaꞌ.
32 M be ce yuꞌni nè wo mncir,
njobèꞌ à be gèe tɛ m riŋ vi.
Hɛ̂
Rloo enɛ Yawɛ̀ jaꞌ ŋwɛ̀ tɛ e riŋ Vi mncir
33 Oo Yawɛ̀, yɛꞌni mɛ̀ yuu ce wo mncir vi ce làa,
tɛ m lɛ vi dù bàꞌ àlʉ̀simbùu.
34 Gèe tɛ m riŋ yuu ce wo mncir vi ce làa,
tɛ m bo lɛ̀ vi ce yuꞌni àgho nè ya ntee—ŋwɛ̀.
35 Càŋsi mɛ̀ tɛ m jɛr àmbò wo mncir vi ce làa,
njobèꞌ vi gèe m ce luꞌshi.
36 Gèe tɛ m lɛ ntee njep wo mcir,
keꞌ ba njep sɛꞌ cicì kaꞌ.
37 Fa màꞌshi tɛ m fa bfee njep buu bcicì kaꞌ,
gèe tɛ m cu ntèe àmbò wɛ̀ làa.
38 Ruusi mo mŋkàꞌni nè mɛ̌ yò ŋwɛ̀ rfàꞌ,
tɛ a bo wɛp wɛ̀.
39 Càꞌsi mncɛp ce m ce wɛp embe mɛ̌ ndùu,
njobèꞌ wo mncir vi bòŋ.
40 Yɛ̂, mɛ̀ shee wo mncir,
fa mɛ̀ ryǒŋ rfi njobèꞌ à yu nrara.
Vâv
Fa nè bfee nè ncir Yawɛ̀
41 Oo Yawɛ̀, dùŋshi mɛ̀ lo rkòŋnì ce nfesè,
jaꞌ mɛ̀ àmbò wɛ̀ kaꞌni nà,
42 tɛ m bo tʉr yuu ce m be bèesi ŋwɛ̀ ce e ce cɛp mɛ̀,
njobèꞌ mɛ̀ fa bfee nè wo blàa.
43 Fa fʉr làa ce mini eku mɛ̌ cùu wàwà kaꞌ,
njobèꞌ mɛ̀ fa bfee njep wo mncir.
44 M be kù ce yuꞌni nè wo mncir,
à nfesè ba à nfesè,
45 ce jɛ̀r wàrwàr,
njobèꞌ m ce ghèter à ryuꞌni nè wo mncir.
46 M be suŋ àmbò wo mncir kùntombì nè bkʉʉ,
kèꞌ koosi rìtu kaꞌ,
47 njobèꞌ m ce yuꞌ rbòŋ nè wo mncir
ce mɛ̀ kòŋ.
48 M be nàa ma mmbo mbekì nè buu ce wɛ̀ làa ce mɛ̀ kòŋ,
ce kwàꞌshi àmbò wo mncir.
Sàyîn
Byemi nè ncir Yawɛ̀.
49 Kuushi yuu ce wɛ̀ m làa nè yò ŋwɛ̀ rfàꞌ.
Làa anà yi fa mɛ̀ rkwàꞌshǐ rbòŋboŋ.
50 Yuu ce yi ce bòose mɛ̀ à ma mlù yi yu enɛ
mo mŋkàꞌni mi gèe mɛ̀ ba ntèe.
51 Ŋgǎa nàanyor a vʉ̀shi mɛ̀ keꞌ ce borni kaꞌ,
geewaꞌa, mɛ̀ keꞌ borni efa ryuꞌni nè wo mncir kaꞌ.
52 Oo Yawɛ̀, mɛ ce kwàꞌshi àmbò wo mncir ce vi m ba elǔuŋgòŋ,
vi ce bòose mɛ̀.
53 Ntee yi ke koꞌ mɛ̀ enjoo se njobèꞌ,
běe bbebep ce a tèetu nè wo mncir.
54 Mɛ ke yòp wo mncir à byɛɛ,
a bdìꞌ wɛɛwɛ ce mɛ̌ ke cu.
55 Oo Yawɛ̀, mɛ ke kuushi lo rlii nètʉꞌ
ce lɛ̀ wo mncir.
56 Yuu ce m ce yuꞌ rbòŋ àgho yi yu enɛ
m ce lɛ̀ wo mncir.
Hɛ̂t
Fa ntee nje mncir Yawɛ̀
57 Oo Yawɛ̀, à yu yà,
mɛ̀ kàꞌni à ryuꞌni nè wo blàa.
58 Mɛ̀ loo mo mmbòŋntee nè ya ntee—ŋwɛ̀,
koosi mnse nè mɛ̀ àmbò wɛ̀ m kàꞌni.
59 Mɛ kwàꞌshi àmbò ya ŋgèe yi yu,
beeŋger ce jɛ̀r ba àmbò wo mncir vi ce làa.
60 M be cɛ̀ɛcɛ à rlɛ̀ wo mncir kaꞌ,
càasi nfèꞌ kaꞌ.
61 Kaꞌ běe bbebep a lèꞌshi btaa nè mɛ̀ waꞌa,
mɛ̀ lèse wo mncir kaꞌ.
62 Mɛ lɛꞌ nè nteetʉꞌ kuꞌsi wɛ̀,
àtu wo mncir ce vi yu kùyɛɛ.
63 M yu ŋkar nè ŋwɛ̀ wɛɛwɛ ce e ce wɛp wɛ̀,
a ce lɛ̀ wo mncir.
64 Oo Yawɛ̀, wɛ̀ kòŋ bèe wɛɛwɛ embe tunshè.
Yɛꞌni mɛ̀ wo mncir!
Tɛ̂t
Mncir Yawɛ̀ vi yu à lulu sê
65 Oo Yawɛ̀, wɛ̀ gèe bòŋboŋ nè yò ŋwɛ̀ rfàꞌ,
àmbò wɛ̀ m làa.
66 Yɛꞌnì mɛ̀ à rkwàꞌshi yuu bòŋboŋ ker fa mɛ̀ bfee,
njobèꞌ mɛ̀ byemi nè wo mncir.
67 Mɛ̀ m ce dàꞌ tɛ mlù mi kaꞌ vʉ̀ nè mɛ̀,
geewaꞌa, m ce yuꞌni nè wo blàa sèꞌni.
68 Wɛ̀ bòŋ, a ce gèe buu bbòŋboŋ.
Yɛꞌni mɛ̀ wo mncir.
69 Ŋgǎa nàanyor a ce yoꞌ mɛ̀ nè mndeꞌ,
geewaꞌa, m ce lɛ̀ wo mncir nè ya ntee—ŋwɛ̀.
70 Wowèe a tèesi mntee àmbò mnfoonyàa ce mi sèeti waꞌa,
geewaꞌa, mɛ ke yuꞌ rbòŋ nè wo mncir.
71 Yi yu yɛɛnì enɛ mlù mi m ba nè mɛ̀,
tɛ m bo yɛꞌni wo mncir.
72 Wo mncir vi yu à lulu nè mɛ̀,
a caa gul ba silvà mncʉ̀kì.
Yôd
Mncir Yawɛ̀ vi yu kùyɛɛ
73 Wɛ̀ m boo mɛ̀ nè mo mmbo a keꞌni mɛ̀,
fa mɛ̀ bfee tɛ m bo yɛꞌni wo mncir.
74 Bèe ce a ce wɛp wɛ̀ a be yɛ mɛ̀ luꞌshi,
njobèꞌ mɛ̀ byemi nè wo blàa.
75 Oo Yawɛ̀, mɛ̀ rìŋ mɛnɛ wo mncir vi yu kùyɛɛ,
a riŋ mɛnɛ wɛ̀ fa mɛ̀ ŋgɛꞌ njo à yu mini.
76 Bòose mɛ̀ nè lo rkòŋnì ce nfesè,
àmbò wɛ̀ m kàꞌni mɛ̀ ce yò ŋwɛ̀ rfàꞌ.
77 Koosi mnse nè mɛ̀ tɛ m bo cu ntèe,
njobèꞌ m ce yuꞌ rbòŋ nè wo mncir.
78 Gèe tɛ rìtu yi koo ŋgǎa nàanyor njobèꞌ wowèe a tee mndeꞌ mbe mɛ̌
tù.
À kaꞌ ba yi àmbò mɛ̀, m be ce kwàꞌshi àmbò wo mncir.
79 Màꞌshi tɛ bèe ce a ce wɛp wɛ̀ a vʉ yɛ mɛ̀,
tɛ wowèe a bo rìŋ buu ce wɛ̀ làa enɛ wèr gêe.
80 Màꞌshi tɛ ya ntee yi ba rara kuu wo mncir,
fà dìꞌ rìtu yi bo koo mɛ̀ enɛ mɛ̀ lɛ̀ vi kaꞌ kaꞌ.
Kâf
Ŋwɛ̀ ce loo enɛ Yawɛ̀ jaꞌ ye efa yi ŋgǎa bbàa
81 M ce kèꞌ mɛnɛ à jaꞌ mɛ̀,
mɛ̀ byemi nè wo blàa.
82 Mɛ̌ coꞌni mmir à ryɛ yuu ce wɛ̀ kàꞌni,
a bipshi enɛ̂, “À be bòose mɛ̀ ba à seꞌkɛ?”
83 Kaꞌ m yu àmbò ŋgùpmrùꞌ ce a kɛ̀ti à njemor waꞌa,
geewaꞌa, mɛ̀ keꞌ lese wo mncir kaꞌ.
84 Mɛ̌ yò ŋwɛ̀ rfàꞌ, m be kèꞌ wɛ̀ bàꞌ fɛ?
À be saꞌ bèe ce a ce fa ŋgɛꞌ nè mɛ̀ à seꞌkɛ?
85 Ŋgǎa nàanyor a tuŋ bbèꞌtè nè mɛ̀,
wowèe a ce cu àmbò wo mncir vi ce làa kaꞌ.
86 Wo mncir wɛɛwɛ vi yu mini,
wowèe a tee mndeꞌ mbe mɛ̌ tù, jàꞌ mɛ̀!
87 Wowèe a ce sɛni càꞌsi mɛ̀ embe tunshè,
geewaꞌa, mɛ̀ màꞌ wo mncir kaꞌ.
88 Màꞌshi mɛ̀ njoꞌ lo rkòŋnì ce nfesè,
tɛ m bo yuꞌni nè yuu ce wɛ̀ làa.
Lamɛ̀d
Rbyemì enjep mncir Yawɛ̀
89 Oo Yawɛ̀, yuu ce wɛ̀ làa,
yi ku ba mini mbe bùu à nfèꞌ wɛɛwɛ.
90 Yò mini ku ba àgho à nfèꞌ wɛɛwɛ.
Wɛ̀ m gèe tunshè, yi ku tɛɛ àmbò wɛ̀ m gèe.
91 Wɛ̀ m làa, buu wɛɛwɛ à ku ba àgho baꞌ ntìni,
buu anà wɛɛwɛ vi ce fàꞌ nè wɛ̀.
92 Mɛ̀ m ba tɛ bà kòŋ wo mncir kaꞌ,
mɛ̀ m ba kwe mbe nfèꞌ mlù mi m ba nè mɛ̀.
93 M be kè lèse wo mncir kaꞌ,
wɛ̀ gèe mɛ̀ cu ntèe njoꞌ vi.
94 A mɛ̀ yò, jàꞌ mɛ̀,
mɛ̀ ghèter à ryuꞌni nè wo mncir.
95 Běe bbebep a lèꞌ mɛ̀ tɛ a bo yʉ mɛ̀,
geewaꞌa, m be ce kwàꞌshi ba àmbò wo mncir.
96 Mɛ̀ yɛ mɛnɛ buu wɛɛwɛ ce vi yu yɛɛnì vi tʉr nfèꞌ ce vi be kè mì
geewaꞌa, wo mncir vi be kè mì kaꞌ.
Mɛ̂m
Rkòŋnì e nè mncir Yawɛ̀
97 Oo njɛ̀ɛ njì ce mɛ̀ kòŋ wo mncir!
Mɛ ke kwàꞌshi àgho à nfèꞌ wɛɛwɛ.
98 Wo mncir vi ke gèe m tʉr bfee caa ya ŋgǎa bbàa,
njoꞌ vi ke kù ce ba njep mɛ̀.
99 Mɛ̀ rìŋ buu a caa ya ŋgǎa ryɛꞌnì wɛɛwɛ,
njobèꞌ mɛ ke kwàꞌshi àmbò wo mncir.
100 Mɛ̀ rìŋ buu a caa bleebèe,
njobèꞌ m ce lɛ̀ wo mncir.
101 Mɛ̀ kani à rgèe ŋgěe bebep,
tɛ m bo yuꞌni nè wo blàa.
102 Mɛ̀ lɛꞌti efa wo mncir kaꞌ,
njobèꞌ wɛ̀ m yɛꞌni mɛ̀ vi.
103 Wo blàa vi lèe nè mɛ̀ ba à njɛ̀ɛ,
vi lèe a caa blù!
104 Wo mncir vi gèe mɛ riŋ buu,
a mbùu ce mɛ̀ bàa ŋgěe bebep wɛɛwɛ.
Nûn
Rraa ce li yu njep mncir Yawɛ̀
105 Wo blàa vi yu àmbò lam ce e ke raa njep mɛ̌ nduunjì wa'a,
a ba rraa njep mɛ̌ rcènjì.
106 Mɛ̀ kàa enɛ,
m be lɛ̀ wo mncir ce vi yu kùyɛɛ, a tɛɛ njoo.
107 Mɛ̀ yɛ ŋgɛꞌ sê,
oo Yawɛ̀, gèe tɛ m cu ntèe àmbò wɛ̀ làa.
108 Oo Yawɛ̀, koo la rfa rnɛ̀sì ce m ce fa enjep mɛ̌ ntee,
yɛꞌni mɛ̀ wo mncir.
109 Mɛ ke fa la ryòŋ à ŋgɛꞌ à nfèꞌ wɛɛwɛ,
geewaꞌa, mɛ̀ lèse wo mncir kaꞌ.
110 Běe bbebep a lèꞌ taa nè mɛ̀,
geewaꞌa, mɛ̀ fʉʉ enjep wo mncir kaꞌ.
111 Wo mncir vi yu à lulu nè mɛ̀ à nfèꞌ wɛɛwɛ,
njobèꞌ vi gèe ya ntee yi ce luꞌshi.
112 Mɛ̀ fa ya ntee à ryuꞌni nè wo mncir,
nfesè, caar dù bà' àlʉ̀simbùu.
Samɛ̀k ס
Mncir Yawɛ̀ vi ke tɛꞌshi ŋwɛ̀
113 Mɛ̀ bàa bèe ce a tʉr mntee bbaa,
geewaꞌa, mɛ̀ kòŋ wo mncir.
114 À yu ya dìꞌ rsʉ̀nì, a ker ba ŋwɛ̀ ce e ce tɛꞌshi mɛ̀.
Mɛ̀ lɛ̀ bfee njep yuu ce wɛ̀ làa.
115 Wèe ce ŋgǎa ŋgèe buu bbebep, nàti nè efa mɛ̌ geŋ,
tɛ m bo yuꞌni nè mncir yà Nyʉ̀.
116 Fa mɛ̀ ŋger àmbò wɛ̀ kàꞌni, tɛ m bo cu ntèe.
Fa gèe tɛ m lɛ bfee enɛ à be jàꞌ mɛ̀ tɛ rìtu yi lo koo mɛ̀ kaꞌ.
117 Tomi mɛ̀ fà dìꞌ yuu moꞌ yi bo jòo mɛ̀ kaꞌ,
tɛ m bo ce fa bfee njep wo mncir à nfèꞌ wɛɛwɛ.
118 Wɛ ke jàasi bèe wɛɛwɛ ce a lɛ'ti enje wo mncir,
njobèꞌ wap bfee kwɛ̀ɛ vi yu à cicì.
119 Wɛ ke màꞌ běe bbebep embe tunshè wɛɛwɛ àmbò dòti waꞌa,
a mbùu ce mɛ̀ kòŋ wo mncir.
120 Mɛ ke kàŋni njobèꞌ m ce wɛp wɛ̀,
a ce wɛp wo mncir.
Àyên ע
Yuꞌni nè mncir Yawɛ̀
121 Mɛ̀ gèe yuu ce yi yu kùyɛɛ a ba yɛɛnì;
fa màꞌshi mɛ̀ nè bèe ce a ce nyʉ̀ꞌ mɛ̀ kaꞌ.
122 Kàꞌni enɛ à be gèe bòŋboŋ nè mɛ̀ ce yò ŋwɛ̀ rfà', tɛꞌshi mɛ̀;
fa màꞌshi tɛ ŋgǎa nàanyor a nyʉ̀ꞌ mɛ̀ kaꞌ.
123 M ce kèꞌ wɛ̀ enɛ à be jàꞌ mɛ̀,
ruusi mo mŋkàꞌni ce mi yu kùyɛɛ.
124 Gèe nè yò ŋwɛ̀ rfàꞌ àmbò lo rkòŋnì ce nfesè li yu,
ker yɛꞌni mɛ̀ wo mncir.
125 A mɛ̀ yò ŋwɛ̀ rfàꞌ, fa mɛ̀ bfee,
tɛ m bo rìŋ wo mncir.
126 Oo Yawɛ̀, nfèꞌ à ghɛɛ ce wɛ̀ ba gèe yuu,
njobèꞌ a bʉꞌ wo mncir.
127 Mɛ̀ kòŋ wo mncir a caa gûl,
a caa gul ce e bòŋ sê.
128 A mbùu ce mɛ̀ lòr wo mncir wɛɛwɛ enɛ vi yu yɛɛnì,
a baa ŋgèe ce yi yu njìnjì.
Pɛ̂ פ
Mɛ̀ fa ntee à ryuꞌni nè mncir Yawɛ̀
129 Wo mncir vi yu bghaghaꞌ,
a mbùu ce m ce yuꞌni àgho.
130 A ke nàshi wo blàa vi fa rraa,
gee bèe ce a rìŋ yuu kaꞌ, a tʉr bfee.
131 Mɛ̀ mʉ̀ꞌ cùu a ce yòŋse àmbò ŋgwe waꞌa,
njobèꞌ mɛ̀ kòŋ à rrìŋ wo mncir.
132 Bèeŋger fyɛꞌ mɛ̀, koosi mnse nè mɛ̀,
àmbò wɛ ke gèe nè bèe ce a kòŋ lo rlii.
133 Kèŋte la rjɛ̀r àmbò wɛ̀ kàꞌni,
fa màꞌshi tɛ yuu bebep yi tʉr ŋger mbe mɛ̌ ndùu kaꞌ.
134 Jàꞌ mɛ̀ embà mmbo bèe ce a ce nyʉ̀ꞌ mɛ̀,
tɛ m bo yuꞌni nè wo mncir.
135 Gèe tɛ wo bsii vi raa mbendù mɛ̀ ce yò ŋwɛ̀ rfàꞌ,
ker yɛꞌni mɛ̀ wo mncir.
136 M ce cùꞌ mŋgoommir,
njobèꞌ bèe a ce yuꞌni nè wo mncir kaꞌ.
Tsadɛ̀
Mncir Yawɛ̀ vi yu kùyɛɛ
137 Oo Yawɛ̀, wɛ̀ yu kùyɛɛ,
wo mncir vi ba yɛɛnì.
138 Wɛ̀ fa wo mncir njo' à yu kùyɛɛ,
a ba mini.
139 Ya ntee yi ce koꞌ mɛ̀ enjoo,
njobèꞌ ya ŋgǎa bbàa a lèse wo blàa.
140 A taase mo mŋkàꞌni mi ba mini,
yò ŋwɛ̀ rfàꞌ à koŋ mmi.
141 M yu yuu kaꞌ, bèe a jaasi mɛ̀,
geewaꞌa, mɛ̀ lesè wo mncir kaꞌ.
142 À yu kùyɛɛ à nfèꞌ wɛɛwɛ,
wo mncir vi ba mini.
143 Mɛ̀ yu à ŋgɛꞌ, a ba à mlù,
geewaꞌa, m ce luꞌshi nè wo mncir.
144 Wo mncir vi yu kùyɛɛ à nfèꞌ wɛɛwɛ,
fa mɛ̀ bfee tɛ m riŋ vi tɛ m bo cu ntèe.
Kôf
Ŋwɛ̀ ce war enɛ Yawɛ̀ jaꞌ ye
145 Oo Yawɛ̀, m ce war nè ya ntee—ŋwɛ̀, bèesi mɛ̀!
M be yuꞌni nè wo mncir.
146 M ce kɛꞌ wɛ̀, jàꞌ mɛ̀,
tɛ m bo yuꞌni nè wo mncir
147 Mɛ ke lɛꞌ tɛ tʉ̀ꞌ kaꞌ raa, war nè wɛ̀ enɛ à jaꞌ mɛ̀.
Mɛ̀ lɛ̀ bfee nje yuu ce wɛ̀ làa.
148 Mɛ ke lò keꞌse nè nteetʉꞌ,
tɛ m bo ce kwàꞌshi àmbò mo mŋkàꞌni.
149 Yuꞌ yà njèndoŋ njoꞌ lo rkòŋnì ce nfesè.
Oo Yawɛ̀, gèe tɛ m cu ntèe njoꞌ wɛ ke saꞌ kùyɛɛ.
150 Bèe ce a ce ghoo ntaŋ mbembep a vʉ̀ àtʉtʉ nè mɛ̀,
wowèe a ce yuꞌni nè wo mncir kaꞌ.
151 Oo Yawɛ̀, kaꞌ yi yu waꞌa, à yu àtʉtʉ nè mɛ̀,
wo mncir wɛɛwɛ vi yu mini.
152 Mɛ̀ m rìŋ yuu ce wo mncir vi làa kɛꞌ elǔuŋgòŋ
enɛ wɛ̀ m gèe vi enɛ vi ba nfesè.
Rɛ̂sh ר
Ŋwɛ̀ ce war enɛ Yawɛ jaꞌ ye efa yi ŋgǎa bbàa
153 Fyɛꞌ yà ŋgɛꞌ, jaꞌ mɛ̀
njobèꞌ mɛ ke lèse wo mncir kaꞌ.
154 Saꞌ yà nsaꞌ nè mɛ̀, jaꞌ mɛ̀,
gee tɛ m cu ntèe àmbò wɛ̀ kàꞌni!
155 Rjàꞌ rli yu nè běe bbebep kaꞌ,
njobeꞌ wowèe a ke fa bfee nè wo mncir kaꞌ.
156 Oo Yawɛ̀, yò ŋkoosimnse yu gòr,
gèe tɛ m cu ntèe àmbo wo mncir vi làa.
157 Bèe ce a ce fa mɛ̀ ŋgɛꞌ ker ba bèe ce a bàa mɛ̀ a yu gòr,
geewaꞌa, mɛ̀ keꞌ fʉʉ enjep wo mncir kaꞌ.
158 Mɛ ke fyɛꞌ bèe ce a byemi ka' yi ce koꞌni mɛ̀,
njobèꞌ wowèe a ke yuꞌni nè wo mncir kaꞌ.
159 Yɛ àmbò mɛ̀ kòŋ wo mncir,
gèe tɛ m cu ntèe njoꞌ lo rkòŋnì ce nfesè.
160 Wo blàa wɛɛwɛ vi yu mini,
wo mncir wɛɛwɛ vi yu kùyɛɛ, a ba nfesè.
Sin ba Shîn
Fa nyor nè mncir Yawɛ̀
161 Bèe ce ŋger yi yu nè wowèe a fa mɛ̀ ŋgɛꞌ à cicì,
geewaꞌa, ya ntee yi ce kàŋni njoꞌ wo blàa.
162 M ce luꞌshi nè wo blàa.
àmbò ŋwɛ̀ ce e kwɛ̀' lulu buu efa ŋkʉ̀ bìr waꞌa.
163 Mɛ̀ bàa mndeꞌ, a jaasî,
geewaꞌa, a koŋ ba wo mncir.
164 Mɛ ke nɛ̀si wɛ̀ ŋkàràꞌ sàamba njep nòŋtʉꞌ,
njobèꞌ wo mncir ce vi yu kùyɛɛ.
165 Bèe ce a kòŋ wo mncir a ke tʉr cumʉnyaŋ ce e yu gòr,
àdeꞌ yuu moꞌ yi gee wowèe a kotè kaꞌ.
166 Oo Yawɛ̀, m ce kèꞌ mɛnɛ à jaꞌ mɛ̀,
a ce yuꞌni nè wo mncir.
167 Mɛ ke yuꞌni nè wo mncir,
a koŋ vi ba à sê.
168 Mɛ ke yuꞌni nè wo mncir ba buu ce wɛ̀ làa,
njobèꞌ wɛ̀ rìŋ buu ce mɛ ke gèe wɛɛwɛ.
Tâv
M ce loo enɛ Yawɛ̀ jaꞌ mɛ̀
169 Oo Yawɛ̀, yuꞌ la rwar!
Gèe tɛ m riŋ buu àmbò wɛ̀ làa nà.
170 Yuꞌ la rloo,
jaꞌ mɛ̀ àmbò wɛ̀ làa nà.
171 M be cùꞌ yòp nɛ̀si wɛ̀.
njobèꞌ wɛ ke yɛꞌni mɛ̀ wo mncir.
172 M be yòp àmbò wo blàa,
njobèꞌ wo mncir vi yu kùyɛɛ.
173 Tami nyor à rjàꞌ mɛ̀,
njobèꞌ mɛ̀ ce wo mncir.
174 Oo Yawɛ̀, m ce kèꞌ enɛ à jaꞌ mɛ̀,
a ce luꞌshi nè wo mncir.
175 Màꞌshi tɛ m cu ntèe ce nɛ̀si wɛ̀,
gèe tɛ wo mncir vi jaꞌ mɛ̀.
176 Mɛ̀ dàꞌ àmbò njèe ce e bʉ waꞌa,
ròo mɛ̌ yò ŋwɛ̀ rfàꞌ
njobèꞌ mɛ ke lèse wo mncir kaꞌ.