yɛ nè mbùm

Vʉ̀ nè Bòŋboŋ à ŋgǒŋ Mbùm

VɄ̀ NÈ BÒŊBOŊ À ŊGǑŊ MBÙM

Ooo Wìmbùm. Rlaꞌ Wimbùm li yu mbe Doŋga Màntùŋ mbe tarte ekù tuuŋgòŋ ba embà mbùuŋgòŋ embe ŋgòŋ Kàmɛ̀run.

Wowèe a m vʉ̀ e mba Tikarè ce emba mbùunti ŋgòŋ Kàmɛ̀run. Wowèe a m byemi enɛ yàp taa à m ba bǎa mbùm ce e m tʉr boo mbaŋrù a tar ce map mli mi m ba enɛ Yàa ba Tàŋ ba Wàr.

À kaꞌ lò ba njoo bìr ce e m lò a ba à nfèꞌ anà, Mbùm à natì embà Tikarè a ce koꞌ à mběp kù tuuŋgòŋ embe Doŋga Mantùŋ na. Wowèe a m vʉ̀ a ku be cu mba Malaꞌ emba Jɛŋ a mʉ nfèꞌ mòꞌ, kaꞌ cu, yàp taa à lo a kwe. Boo vi a loo a kɛꞌ a ce taŋ kʉʉ. Wowèe a m daꞌsi ŋwɛ̀ à ce dù cùu yi jɛɛ. E ba dù bàꞌ bo ba ŋkʉʉ nè yi tu.

Awɛ, ŋwɛ̀ Yàa a du a du a cu kù yàa a too yap kʉʉ enɛ ŋkwe Yàa. Ŋwɛ̀ Taŋ à du a ce cu à mbèp embe Ŋkàmbɛ̀ꞌ a too tàr yàp enɛ ŋkwe Tàŋ. Ŋwɛ̀ Wàt à suu a ce cu à mbèp embà Wàt a too yàp taa enɛ Ŋkwe Wàt.

Banɛ a yu ce e m gèe Wìmbùm à kaꞌ tʉr bkʉʉ e btar e lǔu ŋgòŋ. Wowèe a kùꞌ sèꞌni a tʉr bkʉʉ ncòp taar à mtaar ba bwǐfaa moꞌ.

RYƐꞋNÌ LIMBÙM E À ŊGǑŊ MBÙM

Mndap mŋwàꞌ Limbùm vi yu à ŋgǒŋ mbùm àmbò ncòp ntufuu à mnta waꞌa. Cena yi ce dùŋshi enɛ Wǐmbùm a ce kòŋ à rkù cu àmbò bjeꞌ du kuu à rsaŋ kèr bèꞌ Limbùm mbe njɛ̀ɛ ŋgòŋ e sèꞌni na kaꞌ. Wìmbùm a yɛꞌni, a riŋ à rbèꞌ ker saŋ yàp li ce a m bii wowèe àgho.

Wàꞌ wɛ̀ rìŋ enɛ mŋwàꞌ mŋgàa ba bgheꞌ vi yu àgho wɛɛ a? Wàꞌ wɛ̀ rìŋ enɛ mŋwàꞌ Rur ba Jonà embe Ŋwàꞌ Nyʉ̀ na a bèesi à Limbùm ŋgǎa ryɛꞌnì a ce fàꞌ àgho à mndap ŋwàꞌ a?

Yi yu foŋ enɛ a ce bèesi ŋwàꞌ Nyʉ̀ Lèꞌ Rʉ̀ʉ wɛɛ, banɛ ca ku ce suŋ wèe enɛ à bɛti nfèꞌ mʉcàr tɛ Nyʉ̀ ghoni sèe nè ŋwàꞌ Nyʉ̀ ce yi ku ba ba à Limbùm. Banɛ ŋgǒŋ Mbùm, yi ku cu ba àmbò yi m ba elǔuŋgòŋ na kaꞌ à mbèp rbèꞌ ker ba rsaŋ buu à Limbùm.

MNDÈE ŊGÒŊ E À ŊGǑŊ MBÙM

Ŋgǒŋ mbùm yi bɛ̀r sê. Wǐmbùm à tʉr ndèe ŋgòŋ a Nsoꞌ wèe mbà mbùunti, a tʉr ndèe ŋgòŋ a bèe embe Ŋwàa wèe kùmbùunti, a tʉr ndèe a bèe e mbà Aku ba Mìsàjɛ kù tuŋgòŋ.

Ŋgǒŋ mbùm a tʉr kuꞌ buu gòr se ce Nyʉ̀ à m kupshi kɛꞌ e mbà mboꞌ emba Ntabaa koꞌ du baꞌ mbe mntùu embe Yɛ̀ꞌ mbe diꞌ ce e fetee a caa bdìꞌ wɛwɛɛ embe toꞌ Kamɛ̀rûn nà, a lo embo a bɛr a du mbe mmboꞌ mntùu embe Ŋkàmbɛ̀ꞌ à sùu a baꞌ njep doꞌ enjep Tàŋmboꞌ.

Wǐmbùm à yɛꞌni buu a riŋ àmbò bfèꞌ vi càa mbà njì a ce dù kùntombì a kuꞌ à mnfàꞌ mnsuu ba à rsaꞌ bèe ba à ryɛꞌni ŋwàꞌ ba à rkùꞌsi Nyʉ̀ ker ba à rcu àbee ba à ndèe rlaꞌ. Kuꞌ bèe ŋgǎa ŋkupshi mnduunjì a vʉ̀ a mapshi buu wɛwɛɛ àmbò a ke làa enɛ dìꞌ ce nduunjì yi càa banɛ bkùꞌ vi be vʉ̀ àmbùu moꞌ foŋ na.

a mbò a ku dù nè rbèesì lèꞌ rʉ̀ʉ à njɛ̀ɛ enɛ

RFÀꞋ CE ŊGǍA RBÈESÌ ŊWÀꞋ NYɄ̀ A CE GÈE A LIMBÙM

Wàꞌ wɛ̌ kuushi enɛ a m bèesi Lèꞌ fi embe ŋwàꞌ Nyʉ̀ wɛɛ a?

wàꞌ wèe rìŋ enɛ a saŋ mŋgàa ba bgheꞌ e à ŋgǒŋ mbùm wɛɛ a?

Wàꞌ wèe rìŋ ene a m bèesi ŋwɛ̀ Ruth ba ŋwàꞌ Jonà embe ŋwàꞌ wɛɛ a ker ce yɛꞌni à mndap ŋwàꞌ wɛɛ a?

Geewaꞌa, a ce bèesi lèꞌ rʉ̀ʉ embe ŋwàꞌ Nyʉ̀. Banɛ wèr ce làa wernɛ ku bɛti ba nfèꞌ mʉcàr tɛ Nyʉ̀ ghoni sèe nè ŋwàꞌ Nyʉ ce yi be ba wɛwɛɛ à Limbùm.

Mbùm be kù cu àmbò a m ba elǔuŋgòŋ nà kaꞌ embe fɛŋ rbèesì ba fɛŋ à ryɛꞌni ŋwàꞌ Limbùm.

Yi ba sèꞌni enɛ à vʉ a wěr mbùu tɛ à bo yɛ kuꞌ buu ce rfàꞌ rbèesì ba à rsaŋ ce gèe à rdore bkùꞌ ba bàꞌre embe yisěe toꞌ.

BTU BUU DU KU BUU EMBE DÌꞋ CA.

Cena a buu moꞌ ce a be yɛ mbe ŋgòꞌ fyɛꞌ buu na

Mmbʉ̀ ŋwàꞌ e à Limbùm
Kuꞌ buu ce a saŋ à Limbùm
Kuꞌ buu ce a saŋ embe ŋwàꞌ Nyʉ̀
Bfutu ba mnlèŋshi ba buu ce bèe a làa ker ba buu jɛɛ jɛɛ àmbò a ce bàꞌre ŋgǎa ryɛꞌnì ba buu ce a gèe à mndap ŋwàꞌ wɛwɛɛ
Ker ba njɛ̀ɛ njì ce a dòre njɛ̀ɛ ryɛꞌnì ca ta li du à mntoꞌ wɛwɛɛ e a ŋgǒŋ Mbùm na.
Mndèe ŋgòŋ Wǐmbùm
Njɛ̀ɛ njì ce ŋwɛ̀ mbùm e ke cu, fɛr buu ker ba yi ndèe rlaꞌ.
Njɛ̀ɛ buu ce Nyʉ̀ à m boo à ŋgǒŋ mbùm na.

Ŋgo ye à nòŋ tʉʼ

But he was wounded for our transgressions; he was crushed for our iniquities; upon him was the chastisement that brought us peace, and with his stripes we are healed.

ŋwǎʼ Àsayà kʉ̀kʉ moʼsir ngo bâa53 5