Mndap ŋwàꞌ ryɛꞌnì

Mbena a be yɛ mnfàꞌ ba buu ce vi ce a ce gèe à ŋgǒŋ mbùm du kuu ryɛꞌnì Limbùm à bcor jɛɛ jɛ̀ɛ jɛɛ. Yi bòŋ enɛ tɛ à riŋ enɛ mndap ŋwàꞌ vi yu àmbò mntaar waꞌa à ŋgǒŋ mbùm na ker ba à bdìꞌ moꞌ. Wèr ce kòŋ enɛ wèr yɛ àmbò ŋwɛ̀ mbùm ce bèꞌ ce saŋ ker ce làa yi lî. Ca yi yu àtɛ̀r njobèꞌ ŋgǎa ryɛꞌnì ce a dù ryɛꞌnì bòŋboŋ a yu àgho, a tami nyor à rcàasi bfee ca nè bèe.

Rfàꞌ ce wowèe a ce gèe àdeꞌ ŋwɛ̀ cɛŋ kaꞌ. Wèr be gèe kɛꞌ ce tuusi wèe mnlěŋshi àmbò a ce gèe à mndap ŋwàꞌ anà. Yi bòŋ ednɛ wèr gap wèsèe à mʉ mʉ nfèꞌ ca tɛ wèe bo yɛ kèr ce loo à rfàꞌ ca.

Wèe be yɛɛ à mlěŋshi àmbò ŋhǎa ryɛꞌnì wɛwɛɛ a ke lò fa mntaŋ kaꞌ du yɛ᷅ꞌni bèe. Mndap ŋwàꞌ ce vi ghaꞌ a ba ba à mndap mloo. Ca à nduunjì moꞌ à rbàꞌre bèe tɛ a bo tami nyor bòŋboŋ à rlò bèꞌ ŋwàꞌ Nyʉ̀ mbe nfèꞌ ce a mìsi wɛɛ.

Limbùm yu yuu ce àdeꞌ à ku lɛꞌ efa mmirlò ku du ce yɛꞌni kaꞌ. wɛ̌ ke lò tʉr à rtami nyor à ryɛꞌni bòŋboŋ sê. À rfàꞌ ce yi yu enɛ à fa mntaŋ àmbò à be dù yɛꞌnì. A mbò a ke fàꞌ nè ryɛꞌnì limbùm ca ba à njɛ̌ɛ waꞌa. A ke lò ku ce tapsi ŋgǎa ryɛꞌnì wɛwɛɛ enɛ wowèe a lò tami nyor yɛnì nè buu ce a be dù dù yɛꞌni yàp bèe àgho. A mbùu ce à be yɛɛ ŋgǎa ryɛꞌnì àmbò a cute à ce fa mntaŋ àbee à rdù yɛꞌni mbe ndap ŋwàꞌ.

Ŋgǎa ryɛꞌnì a ke lò ku du yɛꞌni kaꞌ, ŋwàꞌ mòꞌ yu ce a ke fyɛꞌ emboo kaꞌ du à mndap ŋwàꞌ du yɛꞌni. A mbùu ce wowèe tʉr à rfàꞌ nè ŋwàꞌ ca yɛꞌni mbe ndap ŋwàꞌ.

Boo ŋgǎa rkoo ryɛꞌnì a lò duŋshi enɛ wowèe a ce koo à njɛ̀ɛ nduunjì ce a ce bèꞌ buu ce a yɛꞌni à mndap ŋwàꞌ anà. Nè wɛ̀ àmbò ŋwɛ̀ ryɛꞌnì, e ke lò ba mbòŋtu nè wɛ̀ à ryɛ àmbò a koo yuu ce wɛ̀ yɛꞌni a ce fàꞌ àgho mbe ndap ŋwàꞌ ker ba mbe nfèꞌ ce a fʉʉsi. E ke ba à ŋgǒŋ mbùm, mndap ŋwàꞌ ca a bdìꞌ bòŋboŋ à rtaasi bèe yuꞌ àmbò a ce bèꞌ yuu à Limbùm.

Yi ku ba ba àmbò wèr à ba kɛꞌ a suŋ wèe enɛ wowèe a ce fàꞌ nè mŋwàꞌ Rur ba Jonà ce a bèesi wɛɛ ce bèꞌ à wap mndap ŋwàꞌ. A mbùu ce wèr ce tʉr ryɛꞌnì ca tɛ wowèe a bo tami nyor à rkoni lèꞌ Fi tɛ wèr bo tʉr bèe ce a ce bèꞌ buu à Limbùm à bcor jɛɛ jɛ̀ɛ jɛɛ.

Lo rtapsì yi yu à lulu nè wèr