Jonà à kane à rlò ntuu nè Nyʉ̀

1 À m ba nyʉ̀ mòꞌ, Yawɛ̀ à laa nè Jonà ce muu Àmìtai enɛ̂, 2 “Nàti, du à ma rlaꞌ rgòr ce a too enɛ Ninevɛ̀ nà du fuŋ bɛɛ wowèe, njobèꞌ wap bsàrbuu vi koꞌ a niŋ mɛ̀.” 3 Geewaꞌa, Jonà à natì à rcaŋ dù ba à rlaꞌ Tashìsh tɛ e bo caŋ efa bsii Yawɛ̀. E m sùu mbà rlaꞌ Jopà a koni ma keŋ ce e m ce dù à rlaꞌ Tashìsh. E m làꞌ a niŋ mbo à rdù a bèe embe keŋ wèe à rlaꞌ Tashìsh tɛ e bo caŋ efa bsii Yawɛ̀.

4 Geewaꞌa, Yawɛ̀ à tuusì fuꞌ tatap mbendùu rdip rgòr. Ntèendʉŋ à kashì nè rdip caar keŋ à ce sɛrni sàꞌŋger. 5 Awɛ, ntee yi fʉʉ ŋgǎa mfàꞌ embe keŋ ca sê, ŋwɛ̀ wɛɛwɛ à ku ce war ba nè yì nyʉ̀ enɛ e jaꞌ wowèe. Wowèe a m màꞌri yàp buu njep rò tɛ keŋ bo fɛpne. Yi m ce kone waꞌa, Jonà à banè suu yi yu njepmbùu keŋ a noŋ a ce fyɛ̀ɛ mmirlò. 6 Yi kaꞌ ba waꞌa, tu rfàꞌ embe keŋ à suu a tosi à yě ndùu a laa nè ye enɛ̂, “À ce gèe ba kɛ? À ce buumi buumi a? Lò mbekì, war nè yò nyʉ̀! Seemòꞌ e be yuꞌ lisèe rwar jàꞌ sèe efa rkweŋgèr.”

7 Ŋgǎa mfàꞌ embe keŋ a laa fa wǎp mʉ enɛ̂, “Vʉ̀ nè tɛ sèe fyɛꞌshi ka enɛ ndòo ca à vʉ̀ nda àgho mbe sěe ndùu lɛ.” A kaꞌ fyɛꞌshi wɛɛ, a yɛ enɛ njo à koo Jonà. 8 Awɛ, wowèe a bipshì nè ye enɛ̂, “Suŋ ka wèr lɛ̂, ŋwɛ̀ ce e gèe ndòo ca à kaꞌ coꞌ wèr yu nda? Wɛ̌ ke fàꞌ ba kɛ? Wɛ̌ vʉ̀ ba efɛ? A wɛ̀ ŋwɛ̌ à toꞌ efɛ? Yò bèe yu bèe efɛ?” 9 E beesì nè wowèe enɛ̂, “A mɛ̀ ŋwɛ̀ Hibrù; Mɛ̌ ke loo nè Yawɛ̀, ce e yu Nyʉ̀ embe bùu ce e m gèe mdip mŋgòrŋgòr ba nshe.” 10 Wowèe a kaꞌ yuꞌ waꞌa, a wɛp sê, a laa nè ye enɛ̂, “Yuu ce wɛ̀ gèe na a njɛ̀ɛ kɛ?” Wowèe a m ce làa waꞌa njobèꞌ wowèe a m rìŋ enɛ Jonà ce caŋ efa bsii Yawɛ̀ njobèꞌ e m suŋ wowèe waꞌa.

11 Awɛ, wowèe a bipshì nè ye enɛ̂, “Wèr gee ba kɛ nè wɛ̀ tɛ rdip li bo wɛ̀ni?” Wowèe a m ce bipshi waꞌa njobèꞌ ntèendʉŋ à m ku ce tapshi tapshi. 12 E beesì nè wowèe enɛ̂, “Nyɛr nè mɛ̀ maꞌ njep rdip rgòr ca tɛ li bo wɛ̀ni. Mɛ̀ rìŋ mɛnɛ ma ntèendʉŋ ca à koni wèe njoꞌ mɛ̀.” 13 Kaꞌ e m làa waꞌa, ŋgǎa mfàꞌ embe keŋ a ku ce niꞌ yap ba à rdòo keŋ dù àgho àwǎa rò, a moo làr njobèꞌ ntèendʉŋ à m ku ce tapshi tapshi. 14 Awɛ, wowèe a war nè Yawɛ̀ enɛ̂, “O Yawɛ̀, fa màꞌshi tɛ wèr kweŋger à tu ryòŋ ŋwɛ̀ ca kaꞌ. Fa màꞌshi tɛ vi blɛɛ vi ba mbe wěr tù kaꞌ, njobèꞌ wɛ̀ gèe àmbò yi bòŋ wɛ̀.” 15 Awɛ, wowèe a nyɛr Jonà a maꞌ njep ma rdip anà, li ku sùu enɛ nyòoŋŋ. 16 Ca yi gee wowèe a wɛp Yawɛ̀ sê, a gee taŋshi nè Yawɛ̀, a ker gee mŋkàꞌne nè ye foŋ.

17 Yawɛ̀ à ku gee ma nca à mi Jonà, Jonà à cu njep rbʉ̀ nca anà à mnǒŋ btaar.